Dos waraos cocinan a orilla del caño Manamo en Tucupita. Warao manamo, jana Manamo a mumi awerea jisabaya / Tanetanae.com.

Amawitu oko waraotuma janokoina eku ubayajakotai, naminaya dijana, kokotukaya dibuya ka mojo jaramiaro, jebuida coronavirus nojane. Takore, oko naminakitane ja, ka mojo jarane jarane takore, oko nobara eraja weba toaya, Covid-19 wituyana, jebu eraja ebikaya abaya.

Jebu mokomoko kokotukaya ja, ka dibanoko aisia, ka computadora aisia, ka domu bejoro, misi, jakore, tatuma aisia arakate ja, kokotukayawitu ja jebu sanuka tuma, oko tatuma minaja, takore oko owayajakotai aisia jebusanukatuma, ja.

Oko bitu tatuma owaitane, ka mú, ka jikari, ka doko tane owaya, tuatakore jebumokoko taisia yaruya, ka nobara abakitane.

Tiakuare, iji, ama ji nobotomo tane a nobara ekidamiaro, jabona, jo a nana omi tane aisia, yatu a mojo jarakotu:

– Yatu a so kimikitane narukore.
– Yatu najorokitane takore
– Yatu a janoko yarokore, webamo, yatu a mojo jarakitane ja.
– Ji domu bejoro, misi, owakore, ji mojo jarau.
– Iji asikore, obokore, ji mojo jarau.
– Ji waraojaja nobarayakore, ji mojo jarakitane ja yaja kokotuka.

Yatu a mojo jaraitane, jiaka a nana omijaja aisia yatu mojo berekotu. Toatane naminakore, nobara erawituyana jate waraotuma kawana.

Tamaja obojonamo yana, nomewitu nobara eraja tiabuya.

Loading...
Compartir