Una familia warao a orillas del caño Manamo en Tucupita / Tanetanae.com.

Tamaja daisa saba waranu, kokotuka maninakunarai

Oko ka janokoinayata jo ayakara ekida, nome. Oko jo ka janoko a nabatamo jobía, tatajakotai jo a bomba monibuae, atae arakate yaotubunaka tanae. Tamatika arakate oko jo yakeraja a nana nisakatane jobía.

Inasebe eku, tamatika dijana oko jo a nana yakeraja nisaitane jobikitane ja, jisabakitane arakate eku jese. Tanaka takore, nobara eraja ka majate, ka kobe nobarate.

Oko a nana aisiko jobikore ¿jebu nobara sina ka majate?

Diara, sojo nakate, kobe dijote, botukatate, botoboteraja nakate.
Tamaja obojonamoyana, jo a nana aisiko jobikore tane nobaraya, tiakuare, jo yakeraja jobi.

¿Katukane iji jó yakeraja sabuka jobikuna?

Ji burata sanuka jakore, jo nisanu wabinoko ekumo, jo a moara taerawitu yana. Ama ji burata jakore, filtro nisanu, nobara omi sabuka jakitane.
Ji kuare burata ekidakore, tane nonau:

Limón aisia: limón a jo nisaitane, jo 1 litro eku abanu, tai inarao mokomoko naya, nome, a nana kokotukawitu nisanaja, takore tamaja aisia yakera sabuka.

Jokoji aisia: jo abanu botoro eku, taitane jokoji taeraja kawana abanu, yaja jisaka aisia jo a nana nisaya. Taitane jobi.

Loading...
Compartir