Foto: captura.

Tida jisaka Delta Amacuro yatukamo a wai Joana Díaz, ekó tanae Trinidadyata, a waraotuma tamaja tida najobuya, takore Trinidadyata ainataba taerawitu, tiakuare monida.

Karata webatokitane aisia 6 de diciembre eku, opositoretuma oremu najiríae. Ama barokoida a wai Nabarima tai sike dijana joni dijayajawitu, tamajakotai tai petróleo anoko tane butunae tane ja, nabaida a kojo.

Deltana Joana Díaz tai sike ejobonaeyama anakuarika tane, burata konaruyaja. Dijana yaja era sabuka ja, nuruaejakotai noanatá tanae. Tamaja tida awarao dibuyakotai, iboma Stefani Flores aisia sike see tanae dibanoko kokotukaya ekuya, Joana aisia inarera.

Takore awarao arakate yakeraja a deje waranaja rone, dibanoko Facebook ekuya sanuka aisia waraya, takore, yakeraja naminanaja. Sanuka warayakotai, Joana a niboranobo a janoko eku jayama, “secuestrada” jayama.

Deje jawaneraja kabana, karata webatokitane aisia dibubuya, 6 de diciembre saba, Delta Amacuro eku: Pedro Carreño tiajakotai ama “Pimentón” tane, dijana sike canditatotumayama diputadotane. Takore damana dibuyajakotai, karata webatonajayama, “fraude” kuare yama, amasaba dibuyajakotai webatonajayama. Ama opositoretuma ekumo jisaka dakate ekidamate, aobonona yori emo.

Ama barokoida Nabarima tiajakotai aisia… Tamaja eku sike jayama 1 millón barriles de petróleo, tamaja baroko dijayajawitu dijana joni, ama petróleo najokore joni, inasebetuma dijanamo a ina monite.

Loading...
Compartir