Imágenes tomadas de internet, arreglo de Tanetanae.com.

Venezolanotuma Trinidadyatamo atae nabakabuae, inatababuejakotai. Tatuma waranae jotu a karata jebu Covid-19 naminakitane, tai nisakitane wakayayama. Yaja 15 jisamika abate, abanaja tane. Tai arakate naminakitane. Tamatuma dibuyajakotai, tatuka monikata erayama. Misa tamaja eku, kobenajoro Lizeta Hernández tai gobierno a darijatamo sanuka eribunae, ama waraotuma dibu toaya internet a dibanokotuma ekuya tai “duglita” tiajakotai, warao jisaka naeja munuka kuare.

Tai jotarao a wai Douglas Oswaldo Fuentes Tamaronis, aisia «duglita» tiayama, taijakotai a waba nokoae yaja 23 waniku septiembre imaya. Takore tai a waba obojonamojaja nokoae dibanoko Facebook ekuya, yaja 24 waniku septiembre jokomaya. Tai jayama Guasina a cárcel eku, taijakotai tatuka ja, warao jisaka a wai Gerardo Cardona naekuare dabo aisia, yaja 13 waniku septiembre imaya.

Takore ejobaté tiayama, ainataba sanuka dú tiakuare tai Ministerio Público yatamo. Ama warao aidamotuma ekó tía, dibuyaja ekida.

Ama 80 venezolanotuma Trinidadyatamo inatababuaejokatai, kaje sabuka, Tucupita eku ja, inaminanoko granja artesanal tiajakotai eku, tatuka nome asirawitu, yakeraja ubakomoni, yakera najoronaja, ama burata jebura ebuyayama ejobakitane obonokore.

Kobenajoro Lizeta Hernández, tai a darijatamo sanuka eribuae, tatuma sike obojonamo warayayama, jisaka dibunae carro najoro a konarukoinatane eraja konakitane dibunae, tai mate wakayayama. Tamaja tai jotarao koboida «Chugaby» asía kokotuka dibunae, tai Lizeta Hernández.

Loading...
Compartir